Akana, sar pes del duma pal koda so pes mušinel te kerel anglo Roma, kampel te kerel buči savaha pes hazdela e čačutni romaňi reprezentacija. Kada hin sakone nipos (národ) u the amen o Roma mušinas maškar peste te arakhel kajsen manušen, saven ela pačaben avre Romendar, saven ela mandatos kie koda, kaj te reprezentinen savore Romen. Pal ada pes del duma deš berš u mek pes naarakhľa drom, sar kadi reprezentacija te thovel. Hin vajkeci manuša, pal save pes del duma, ibaj te enas thode sar reprezentanta, kajča ňikas nane mandatos savore Romendar u vaš oda pes kritizinel lengeri pozicija. Andre kadi buči pes mušinen te thovel savore Roma u musaj te arakhel kajsen kandidaten, saven ela pačaben maškar avrende. Hin kajse romane „reprezentanta“ saven kidle avri o gadže. Šaj dikhas savi kale manuša keren anglo Roma buči, sar lenge pomožinen, kajča oda hin savoro. Te pre lende vareko thovel kritika, nane oda ňič platno, bo amen o Roma len našči voľinas vaš oda len tiž našči odvoľinas. Kadi situacija kampel te prikerel koleha, kaj peske korkore kidaha avri amaren čautnen reprezentanten, saven ela amaro mandatos, saven voľinaha the šaj odvoľinaha te nakerena anglo Roma koda, so lenge kampel. Kada hin jekh drom, saveha šaj džas, bo oda hin demokraticko the phundrado drom angle sako pačivalo the godžaver Rom, savo kamel te kerel buči anglo aver, na ča angle peste. E situacija hin kajsi, kaj imar mušinas te rodel the te hazdel peskeri reprezentacija, savi ela voľimen andro demokraticka, phundrade voľbi u kajsa reprezentacija ela savori zor le Romendar.

Akana pes kisitinel bari buči maškar o Roma u the le gadžen hin kisitimen buči, savha pes kamen te prikerel amare problemi. Phučiben hin kada, ko paš adi buči kamel te reprezentinel savore Romen, kas hin maškar savore Roma zoralo lav the pozicija – kolen, kas kidle avri maškar o Roma o gadže? Kerel pes koncepcija pal o Roma, kaj hin le Romengero lav kie kadi buči? Kiden pes avri romane poradci pro okresi, ministerstva, komisiji – keci hlasi chudle le Romendar u save Roma le navrhninde? Pal kada savoro mušinen te rozhodninel o Roma korkore, bo džal pal amaro dživipen the pal oda, so amenca ela dijader. Vaš oda mušinel te el demokraticko šancija sakone Romes, savo pes šunel sar Rom u kavke kamel te dživel. E bibacht perel pre amare kale šere, u andal amare kale šere musaj te džal avri amari „godži“ pal koda, ko amen reprezentinela. Mijen oda godžaver pačivale Roma, pal save terdžuvaha savore jekhetanes, saven daha mandatos, savenge pačaha u daha lenge amari podpora u pomožinaha lenge andre savoro so lenge kampela. Te kada dokazinaha, ela amen čačutni zoraľi romaňi reprezentacija, savi mušinena te respektinel savore Roma the o gadže. Te ačhuvaha ča paš oda, kaj rovaha the nacirdaha o vasta sar žobraka, ta amen naužarel ňič lačho andre adi phuv, ani avrether. Amari jekh šancija hin te thovel pes pre peskere pindre, angla peste te thovel godžaver, zoralen reprezentanten u jekhetanes te kerel savoro so birinaha, kaj amen te el feder dživipen.

Dezider Giňa