Ľinajutno ideos sar o kham fejs tačarel, hin perdal o manuša tiž moneki nalačho. U vaš kada bi kamenas o džene vareso pal oda te džanel kaj pre peste te merkinen. Nekhbuter kampol te merkinel pro čhavore akor, sar hin len o prazdňini, sar phiren pro tabora, sar pes landžaren, sar hine avri pro kham calo džives.

So šaj pes ačhel manušeske la cipaha.
E zor le khameskri hin meksa zoraleder akor, sar manuš hin paš o paňi, paš o moros, pro uče verchi akor manuš le khameske pašeder. Nekhzoraleder o kham tačarel andro dilos dešujekhakro, the pal diloskro dujengro. Andre kada ideos leskri zor predžal the perdal o chmari. Akor pes natromal te pašľol pro kham odoj kaj phurdel e balvaj. E balvaj le manušes šiľaľarel u jov načujinel le khamestar o tačipen. Sar manuš imar musaj te avel avri pro kham, ta mušinel pre peste bares te merkinel bo o kham nača hoj tačarel, aľe manušes the nasvaľarel.
O cikne čhavore andro duj berš hine pre oda nekhgoreder. Vaš oda bi nakamenas te avel avri pro kham, aľe aňi odoj kaj pes le khameskri zor dochudel. O phureder čhavore šaj aven avri pro kham, aľe tiž na calo džives. Musaj len te avel pro jakha okuľara, o šere varesoha garude, vaj čapkaha, abo pherneha, abo šnoptigľoha. Aľe nekhfeder hin sar nane avri pro kham, kajča o čhavore kada pares doľikeren sar naphiren andre škola ta akor hine avri tel o kham calo džives. O kham the o paňi hin le Devlestar u jon peske kamen oda te udživel.
O terne manuša, the o phureder by nakamenas pro kham te pijel thardži, bo latar hine paľis bares strapimen, zuňimen. U sar zasoven avri tel o kham ta imar lenge baro viros.
Ľinaje manuš musaj te pijel but paňi, dživesestethe duj trin ľitri, aľe the buteder.
Nane jekh save paňa manuš ľinaje pijel. Paš o običajna paňa bi manuš kamelas mekh te pijel the minerana paňa saven hin andre peste vitaminos, C the B. Ovocna šťavi, mošti, u sar kada nane ta kampol te pijel tejos citronani.
Hin phendo kaj lačhes hin te pijel tejos ovocno, kalo abo želeno, aľe nakampol andre te čhivel cukros. Tiž hin lačhes te pijel običajno paňi.
Ľinaje bi manuš nakamelas te pijel gule limonadi, koli bo odaj hin but cukros. Tiž nakampol te pijel but mineralki so hin andre o bubľinki, the ajse paňa kaj hin but kisličňikos angareskro (uhličitý).
Sar cinaven peske o paňa ta kampol tiž te dikhel či imar nane purane.
Te imar manuš musaj te avel avri pro kham, ta tiž hin lačhes peske te makhel o celos, e cipa ajse kremoha so manuš pro kham nalabol. Kremi hin všeľijaka, ča andre skľepa kampel te phučel savo hin nekfeder, abo savo hin lačho. Sar kada savoro manuš ľinaje doľikerel ta namusaj les te avel ňisavi trap ale nasvaľipnaha. U amari redakcija tumenge kada jilestar žičinel.

Gejza Horváth