Talam but Roma dživen avka, hoj mušinen peske te lel kečeň, bo našči dživen avri calo čhon, ča la podporatar. Aľe tiž hin ajse Roma hoj len kečeň angloda, kaj o love prekhelde andro automati, abo prepile andro karčmi. He jekh he aver keren pre peste o bare adošagi u kiden kečeň pro interešis ajse romendar, so lenge mušinen te del pale mekh jekhvar ajci love keci ile. Mušinen len te del upre interešis 100%. U sar naden lenge o Roma o love pale andro časos, ta o interešis lenge barol čhon, čhonestar. O Roma le Romendar keren žobraken u hin lenge jekh kaj pal o čore Roma cirden tele e cipa.

O ľichvara imar našade savori pačiv, pro čore Roma barvaľon. Hin lenge jekh, či oda pheň, phral, strična čhave, bibi, bačis, či aver fajtos. Ale problomostar džanel e vlada, o pandle tiž, aľe sar kampel te sikhavel pre oda manuš so del kečeň pro interešis, ta narakhel pes aňi jekh Rom so bi phenelas avri ko oda hin. O Roma pes daran, bo o ľichvara len maren, lengre čhaven ispiden ki e prostitucija, bičhaven len te čorel, te bikenavel o drogi, pre lengre občanki cinaven peske andro khera so pes del. Nekh goreder pre oda has the hin o Roma Ustendar, Ostravatar, Karvinatar. O šingine imar roden ola manušen so den kečeň pro interešis, andre ada lenge šigitinen, o romane poradci, o asistenta, the ola Roma so pes nadaran. Kajča hin the ajse Roma so naden te domukhel pro ľichvara, bo te len naden kečeň jon ta meren andre bokh. E banka bi len kečeň love nadelas, bo o Roma nakeren buči, ňisoha našči nagarantinen kaj dena la bankake o love pale. Hin ada baro čačipen u o ľichvara alestar lačhes džanen, the chasňinen oda avri. Sar vareko merel, abo pes vareso kerel andre fameľija, či bijav, či boňa, abo pes ačhel vareso ta o ľichvara pes korkore podmaren le Romenge kaj len dena kečeň. U le Romenge naačhel ňič aver ča ta kerel pre peste baro adošagos, the vaš oja cena hoj džanen kaj mušinena te del pale 100% interešis. Andre Čechiko hin but ajse Roma so barvaľile la ľichvatar, the kerde imar but Romendar žobraken. Ko džanel olestar save manuša ada keren ta midel te džanel le šingunenge, abo šaj kontaktinen the varesavi romaňi organizacija. Dureder oda imar avka našči džal, le Romenge musaj te šigitinel.

Gejza Horváth

Romale – pheňa the phrala, phenen Imar dost!
O Interešis hi baro phuj, nalačno!
Ňiko našťi cirdel avre manušeske e cipa tele!
a Dile tumen kečeň u kamen tumendar pale buteder?
a Kampleas tumenge love ta liňan pre peste kada pharipen?
a Phende tumenge, hoj tumen marena, sar napočinena?
a Marde tumara romňa, the le čhavoren?
a Daran tumen u nadžanen sar dureder?
Džan pal asistentki, so keren buťi la Policija ČR. Pomožinena tumenge, vičinena le žandarem, šingunen, čhinena tumenca tele tumara lava the ratinena tumara fajta.

Telefoňinen: 608 708 921, 608 764 321, 974 834 547