Akana pes lidžal bari diskusija pal koda, so te kerel le čhavorenca, save keren bare problemi u džan the avke dur, kaj manušes the murdarena. Andre vlada kamen te kerel avke, kaj ispidena e hraňica kana thovena o došalipen pro čhavore imar dešuštar beršendar. Aver phenen, kaj oda naanela efektos sar kamas u hin len argumenti, save dičhon sar godžaver. Anglal phenen, kaj kampel te hazdel o došalipen pro dat the pre daj. Kada argumentos hin zoralo, bo te dikhaha pašal peste, kecivar hin avke, kaj o čhavore peske keren so kamen, hine agresivna u nane pre lende kontrola le dadestar the la datar. Amare romane čhavore hine čepo aver. Jon hine pre sera le gadžikanendar, vaš koda nane kajse vibita the phurore. Kajča keren vareso aver. Phiren andro herni /le dadeha the la daha/, phiren te kidel „sběri“ u keren koda, sostar amene kamelas te el bari dar. Sikľon pro drogi. Kada akana hazdľiľa paš kole, so avle pale andal e Anglija. Kadi bibacht hazdľoľ igen zoraha, u kampel, kaj pre ada te das baro pozoris.

Te dikhaha sar amenge andro terne hazdľaľa e populacija, šaj avas bachtale, keci čhavore amenge baron. Hin akana avke, kaj e romani populacija hini meksa terneder, sar sas ango vajkeci berša. Bare zorale hin kole berša, kana sas pal e revolucija u akor uľonas mekbuter romane čhavore. Adadžives lenge hin dešutrin, dešuštar berša u paš kale čhavore hin mekbareder riziko, kaj pes mukena andro drogi. Ko kada problem naprindžardža, oda hin bachtalo manuš. Oda bari katastrofa, kana pes vareso kajso ačhol. Vaš koda kampel, kaja te prindžaras savore rizika so andre kadi bibacht hin. Te prindžaras so majsigeder, kaja o čhavore pes mukle pre kada bibachtalo drom. Kampel lenca te vakerel, te džanel kaj phiren, kaha pes kamaradzinen, u so keren te nane paš amende. O romane organizaciji pes kamenas te mukel andre kadi buti, savi o gadže imar keren sar profesionala, u džanen, sar kajse manušenca te kerel. O lachika čhavore hin pre kada mekgorede, u hin maškar lende bari bibacht koda, kaj oleha nadžanen so te kerel. Andre kada kampel te džanel te kerel „prevencija.“ Kajča pre kada kampel sikade manušen, save prindžaren e „problematika“ u džanen so laha te kerel. Hin amen bare problemi le bešibnaha, nane amen buti, o gadže preamende našči dikhen, u nadre kada savoro te avena mek o problemi le drogenca, ta imar diliňaľuvaha avri. Hin mek varesavo „časos“ pre koda, kaj oleha te chudas vareso te kerel, kajča te nabajinaha kolestar so imar hin akana, ta paľis ela nasig. Ogadžikane čhavore imar pele andre balamuta, u ela phares lenac vareso te kerel, vaškoda len kamen te thovel kio sudi imar dešuštar beršendar. Romale, achaľon soda kada hin? Amare čhavore džana andro berteni sar perša.

Dezider Giňa