Hin Roma, so mek adaďives pes ladžan te vakerel bare gadženca. Te džan pal e buťi, ta ča phučen: „Kampel tumenge andre buťi?“ A te o baro raj chudela te vakerel, o Rom les aňi mište na achaľola. Te lestar phučena: „So tuke phenďa o baro raj?“ ta phenla: „Me na džanav.“ Hin Roma, so the achaľon, aľe th'avka len pre buťi nane bacht. Kamav tumenge te vakerel pal jekh čhaj the pal jekh čhavo.

E čhaj hiňi avrisikhaďi, kerďa maturita pre maškarutňi poštovno škola. Gejľa pre pošta te phučel, či la lena andre buťi, sikhaďa la maturitakero ľil la upraluňake (veducake). E upraluňi lake phenďa, hoj kampel lake džuvľa, aľe te šulavel. E čhaj lake phenďa, hoj na sikhľolas štar berš te šulavel.
Paľis gejľa e čhaj te phučel andre sklepa chabnaha. Avľa ke late e upraluňi u phučľa: „So kames?“ E čhaj phenďa, hoj rodel buťi. E gadži la na mukľa te vakerel dijader, phenďa, kaj peske našťi lel pro sumeňis, bo andre kasa šaj jel the šel ezera.
E čhaj rozvakerďa la raňake pal e socijalka u e raňi phenďa, hoj odoj telefoňinla u paľis la čhake phenela, sar so. Hin oleske duj čhon, la čhake na phenďa ňiko ňič. E čhaj gejľa te phučel andro thamekero foros – odoj lake phende, hoj the pre pošta the andre chanbaskeri sklepa sas čučo than. Soske la akor na ile andre buťi? Bo hiňi romaňi?
Akana tumenge phenava pal o čhavo.
Kada čhavo hin imar terno Romoro – hin les pandž churde čhavore. Kerelas buťi, šulavlas o foros, o džungipen kidelas avri sar čhardo. Paľis les andal e buťi premukle, bo „marenas tele le buťakerengero gin“. Kamelas bi te kerel buťi, aľe buťi nane.
Kada Romoro bešel imar keci berš andro jekh nango kheroro – jov, e romňi, panadž čhave. Gejľa pal o šeralo te mangel bareder kher. O šeralo leske phenďa: „Sar poťineha o kher, te na keres buťi.“ Phenďa le šeraleske, hoj kamel buťi te kerel, aľe ko čharde les na len. O šeralo: „Mišto, me tuke buťi arakhava.“ Čačo! Arakhľa leske buťi andre bari, bari tovarňa Hutchinson. O Rom – baro baripen, hoj kerela buťi andre bari tovarňa Hutchinson.
Duje ďivesenca kamľa o Romoro te džal andre buťi. Aľe o baro baripen pal leste sikra po sikra perelas tele. Dži akor ča šulavela foros romaňa partijaha. So ela andre bari tovarňa? Ča žuže gadže. So maškar lende kerela jov? Sem na achaľola, so lestar mangena. Asana lestar. Raťi na te zasovel. Maj les sas kerades, maj les o šila marnas, o paňa pal leste čuľanas. So lestar tajsa kamela o majstros? So te na džanela, sar te kerel paš o strojos? Terďola, na džanela sar so – sem oda bari ladž! O gadže asana, vaš savo dilino Rom pes o šeralo privakerďa. Tradenas les khere.
O Rom zasuťa ča kije tosara. Tosara chuťiľa opre – sas mek časos te džal andre buťi, aľe ajsi dar sas le čhavoreste andro jiľo, hoj na gejľa.
Mek oda ďives gejľa pal o šeralo. O šeralo imar džanelas, hoj o Romoro andre buťi na sas. „Ta so na gejľal andre buťi?“ dikhľa pre leste choľaha. O Rom kamelas le šerleske te phenel čačipen, hoj mek ňigda šoha andre ajsi bari tovarňa buťi na kerlas, ňigda šoha na kerelas ča maškar žuže gadže, hoj daralas, hoj ela pre ladž. Aľe na džanelas, sar le šeraleske te phenel. U mek te džanľahas te phenel avri, ta leske th'avka o šeralo na paťala. Ta feder leske chochaďa, hoj zasuťa.
„Arakhľom vaš leske prestižno buťi - o Rom na gejľa, bo zasuťa!“ Buter na phenďa o šeral lavenca, aľe andre leskero muj dičholas oda gadžikano teledikhiben: Ta so kames? Roma, na?
Štar berš thovelas o šeralo pro mitingi le Romeskero „zasoviben“ le dženenge anglo jakha sar argumentos, hoj o Roma te kerel buťi na kamen.

Ilona Ferková