T'aven bachtale, Romale, andro Baro Than. Varesave dženenca, so san adaj, man arakhľom imar čirleder, dikhav adaj the but neve muja – aľe savore sam phrala pheňa. Soske avľom maškar tumende? Bo šunav andro jilo, hoj man le Romenca phandel jekhipen. Sajekh man chudelas le jilestar, hoj o Roma na daran le dživipnastar, hoj o veša paňi sas lengero kher, aľe jekhbuter oda, hoj o romano kokal na phagela ňiko.

Avle arde Roma andal but thema pal calo luma. Amaro festivalos hazdela opre o phraľipen, so le Romen jekhetňarel lengera indickona famiľijaha, oda phraľipen, so džal dži dur andro čirlatune ezera berša.
Dešupandž milijoni Roma dživen čhivkerkerde pal calo luma. Lengeri historija vakerel dukhaďi paramisi pal oda, sar le Romen murdarenas, sar len tradenas than thanestar, aľe adi paramisi vakerel the pal oda, sar manušano voďi džanel te khelel avri, kaj savi bibacht manušes te marďahas. O murdaripen, so le Romen marelas buter sar ezeros berš, iľa pre peste jekhgoreder bengiňaľi parsuna andro dujto mariben, kana o nacisti kamenas te chal savore Romen pal o svetos. Th'avka o Roma ačhile džide. Sikhade, hoj lengero tromaďipen the lengeri goďi na del le Romeske te merel. The o Indi hine ajse – o džene andal odi čirlatuňi phuv, khatar the o Roma avle.
Dži adaďives ľikeren peske o Roma peskero romipen, peskeri identita, u kamen la mek buter te hazdel opre. Paš oda pes integrinen maškar o nipi andro thema, kaj dživen. Peskere jileha, voďeha the goďaha šukararen avre themenegeri kultura.
Andro jekh jekh thema vičinen le Romen avre navenca. O Roma ačhile čačes bari maškarthemutňi famiľija. Vašoda džanen feder sar averdžene te ľikerel paťiv the achaľipen maškar o manuša, u džanen te šegetinel kij'oda, kaj te na avel mariben andre luma. Pal o angluno maškarthemutno romano kongresis, so sas andro Londinos andro apriľis 1971, džanen o Roma so jekhvar feder, ko hine, u savo than šaj resen maškar o aver manuša the mašak aver narodi.
O Roma dživenas the dživen bašavibnaha, giľenca. Bares barvaľarde bašavbinaskeri tradicija andro tosarutne tho raťutne riga. Aľe o bašaviben nane ča oda jekh, so o Roma džanen. O Roma džanen te dživel u oda džaniben pes sikhavkerel andre lengeri kultura, andre sako lengere kulturakeri forma. Bibachťake, lengeri kultura hin učharďi ezereberšengere naachaľipnaha. O gadže la na džanen u na kamen la te džanel. Vašoda na den romaňa kulturake ajsi paťiv, savi kampľahas. Aľe adaďives hin Devlestar, hoj romaňa kulturakero baripen the šukariben avel opre. Kana e koraraďi luma predikhela pro jakha, dikhela la romaňa kulturakero šukariben u šaj peske lela chasna lakere barvaľipnastar. Romaňi čirlatuňi kultura na sikhavel ča oda, hoj uľiľa andre India. Adaďives den pes andre late anglal but neve ideji. Me paťav, hoj oda, so amenge o Roma sikhavena pre amaro fastivalos, kovľarela sakoneskero jilo.
Hin igen lačhes, hoj pes o festivalos kerel adaj. O Pandžab hin le Romenge pašes. Andre romaňi kultura pes den anglal bute kulturengere elementi, aľe e indicko kultura hin andrebararďi chor andre lakero voďi. Ipen kada, hoj andre romaňi kultura hin jekhetane khude ajci maškarthemutne elementi, la hazdel opre. Specijalnones andre adaďivesutňi luma.
The e India dživelas but šelberša andro dasipen. O Del la marelas keci ča kamelas. Aľe lakero nipos sajekh ušťelas opre – u adaďives hin leske o drom phundrado. E India del peskero čirlatuno baro džaniben savore manušenge. Mi la Indiakero barvaľipen ačhel savore manušengere barvaľipnaske. Jekh kotor la Indiakere barvaľipnastar hine o Roma. Sar imar phenďom, o Roma sikhaven avre dženenge, sar te predživel jekhgoreder bibacht. The amen o Indi ada džanas, u sam barikane andr'oda. Amaro kokal na phagela ňiko – ada amen phandel le Romenca jekhetane. Ada phandel le Romen lengere Bare Thaneha, la Indiaha. Aľe me phučav: džanaha amen te predživel oda, soha manušes murdarel adaďivesutňi civilizacija?
O indicko nipos ľikerel le Romen! Mi barvaľaren peskeri kultura, mi la buchľaren pal calo luma. Mi sikhaven avre dženenge, sar te phandel jekhetane peskeri identita internacijonalnosťaha. Mi sikhaven avre dženenge, hoj manuš šaj sikhľol te achaľol avre manušeske, hoj manuš šaj del paťiv avre manušeske, hijaba kaj o aver hino aver, hijaba kaj vakerel aver čhib. Mi sikhaven o Roma, hoj pes del te dživel andre harmoňija, hoj pes del te paťal le dživipnaske.
Mi del o Del bacht tumare festivaloske, mi del tumen šukar ďivesa andre India.
Upre Roma! Roma zindábád! Sasťipen!

V příštím čísle přineseme český překlad.