So anglal mande mol e romaňi čhib
E romaňi čhib angle mande ňič na molos, dži andre mire dešuštar berš. Ňiko ke amende khere na delas duma romanes. Ča jekh manuš andre miri fameľija vakerelas the manca duma romanes u oda has miri baba.

Na kamav te phenel, hoj miri daj na džanel romanes, aľe pre ma delas duma ča gadžikanes. E baba pre savorende del duma ča romanes. Vaš oda me savoro achaľuvavas, aľe te del duma romanes man ladžavas. Ladžavas man, hoj vareso phenava u savore mandar asana. Sa pes previsarďas, kana mange sas dešuštar berš u sar chudľom te del duma romanes mire romane kamaradenca. Lenca polokores chudľom te vakerel u som but rado, hoj ajsi šukar čhib džanav. So hin mek buter, hoj romaňi čhib hiňi miri, feder phendo hoj hiňi mira dakeri čhib.
Akana imar našťi pro jakha dikhav ajse čudaken, so hine kale sar topanka u na kamen te del duma romanes. Kajse manušen narado dikhav. Aňi ajci na džal pal oda, hoj na džanen, aľe pal oda, hoj na kamen pes te sikhavel amari čhib. Ňigdaj nane nasig. Me sikhľiľom ča andro dešuštar berš. Akana hin mange biš berš u sikhľuvav romistika pre Karlovo univerzita Prahate.

David Tišer