Manuš nadžanel so les andro dživipen užarel, so pes leha šaj ačhel, so šaj pes leha kerel. Vareko peske o dživipen diriginel korkoro u varekaske les diriginen aver džene. Kamav tumenge te vakerel pal ola manuša, so len nane kaj te bešel, gadžikanes pes lenge phenel (bezdomovci). O podvodňika, o špekulanta, o fameľiji, o režimos, e politika the o ekonomicka reformi andre dojekh štatos peske keren le bezdomovcenca so kamen.
Manuš šaj peske avel korkoro došalo vaš oda hoj pes lestar ačhiľas bezdovovcos, aľe manušestar šaj kerel bezdomovcos the o štatos.

Šaj avel the avka: Akor sar pes o rom la romňaha rozdžan, sar len o sudi rozvedzinen, the naden jekhe dženes bitos, ta paľis ole manušes nane kaj te bešel.
Abo šaj avel the avka: Sar vareko bikenel štatno kher the o uradi leske androda mekh pokamorekik šigitinen, avka hoj vatinen jekh kher vaš aver. Paľis le manušes nane kaj te bešel. Bezdomovcos šaj pes ačhel the ole manušestar so dživel čak pal e podpora, abo the ola dženendar so nadžanen so hin zakoni u nakeren peske olestar ňič. O sudi naprebačinen ňikaske ňič, bezdomovcos šaj keren manušestar jon korkore. Bezdomovcos šaj keren manušestar the o uradi. Hin len pre oda, avka šaj pas dovakeren, hoj ola manušen ko napočinen o khera, abo ko pes nadžanel te ľikerel (nepřispůsobivé) ta les čhiven andal o kher avri pro drom u aver kher les imar naden. Kada keren nekhbuteder le Romenca, vaš oda, hoj len nakamen maškar peste. Šaj phenav, hoj presnes kada kerdža le Romenca o urados andro foros Rožnov pod Radhoštěm.
Bezdomovcos šaj pestar kerel manuš korkoro, sar narokom napočinel o kher, o love peske thovel andre žeba, pijel andre, abo prechal. Korkoro peske kerel pre peste baro adošagos, paľis les peken avri andal o kher pro drom. Bud manušendar pes ačhile bezdomovci the angloda, kaj našade e buči.
Vaš oda len nahas love, o khera napočinenas u o adošagos lenge barolas the barolas. O uradi oda ile andro vasta akor, sar imar o adošagos has ajso baro, kaj manuš nahas stac oda te počinel avri. Thode les te bešel andro holobitos u odarik les paľis čhide avri pro drom. Kada keren le Romenca u o štatos mekrozmarel e fameľija avka, hoj lel lenge le čhavoren andro javitovos, bo len nane kaj te bešel.
E banka bi nadelas čore manušes kečeň, aľe hin ajsa realitna kancelariji, the firmi so korkore roden avri čore manušen. Den len kečeň u paľis len ľikeren tel e men. Dženo saves nane love, ta priačhel pre savoreste. Te peske lel kečeň čepo love, ta mušinel lenge te počinel baro interešis, u sar lel kečeň but love, ta mušinel te thovel simadži o kher abo o bitos. Čore manušes nane love, u sar napočinel o adošagos ta savoro leske len, keren lestar bezdomovcos.
Varesave Romendar pes ačhle bezdomovci tiž angloda, hoj daratar emigrinde anglo skiňi, anglo rasizmus, the angle diskriminacija. Bikende o khera the le butorenca (se zařízením) the denašte ande aver štati. But Roma nachudle azil the mušinde pes te visarel pale khere, aľe te bešel len imar nahas kaj.
Phenav tumenge čačipen, the me kamavas te denašel, aľe sar dikhľom hoj o Roma aven pale khere, ta nageľom ňikhaj.
Manušestar šaj pes ačhel bezdomovcos makarkana the makarsar.
Phenav tunenge sar kerdža bezdomovcos jekhe gadžestar, korkori leskri fajta.
O Frantas uľila andre lačhi fameľija, hino duje čhavendar, bešenas pre Slovensko andro gav. Sar iľa romňa, ta bajinelas pal late, the pal o čhave. Phirelas pro Čechi te kerel buči kaj te zarodel buter love. Kampoles lenge te prikerel o kher, so chudľa leskri romňi mekh sar has korkori, le dadestar, la datar.
Sar imar has o kher maj kisno, ta akor le Frantaskri romňi peske rakhľas avres muršes the le Frantaha pes rozgeľas. Nahas les kaj te bešel ta vaš oda ačhľa te kererel pro Čechi dureder. Androda leske muľas o dad e daj, aľe mekh sar dživenas ta leskri pheň kerdža ajsi špekulacija, kaj diňa pre peste te pisinel o kher. Le Frantas imar nahas kaj pes te visarel, aňi kaj te bešel, adadžives imar čak užarel pro meriben.
O bezdomovci ľinaje soven avri tel o holo ňebos, abo andro purane čuča khera, andro pivňici, andro kanala, garuven pes le manušendar, the le šinginendar. Chan o chabena andal o kondira the so ačhel pal o manuča, the žobrinen. Hin len infekčna nasvaľipena. Jevende pes pal o tačipen cirden pro štacijoni, bešen andre mašina the phiren laha ogorestar pro agor. Ľikeren pes všadzi odoj, kaj šaj pes tačaren. Bud bezdomovci hin chasňimen avri pre buči, keren pro kales, čak vaš o chaben the vaš o soviben. Sar pes lenge vareso paš e buči ačhel, ta nachude ňikastar ňič. Kaj te aven andro tato, the kaj len te avel so te chal, ta korkore peske vareso keren, kajča len telen andre špitala. Abo vareso čoren, phageren, abo varekas maren, čak angleda kaj len te phanden andre bertena. Odoj len hin o chaben, the bešen andro tačipen.
Kajča aleha peske o bezdomovci but našigitinen, lenge kampel, kaj lenge te šigitinel o štatos. O manuša dikhen pro bezdomovci sar te pro džviri, ale ňikas nainteresinel kaj o bezdomovci dživen sar hareštanca, jekh avri tel o holo ňebos, u aver pandlo pal o mreži. Jekhes pravos naden u avreske o pravos ile. Ta soha hine pesar feder.

Gejza Horváth