Prahate andro baro kher YMCA sas 30. 6. kajso kidipen savo džalas pal koda, sar o Roma paťan le Devles. Šukar sas, kaj pes ode sikhade romane rašaja, studenti the manuša, save andre kada keren buťi. Sas ode o David Dudaš, rašaj Rokycaňatar, o Ondřej Kováč savo kerdža evangelicko fakulta UK, e Květa Carrarettová, studentka pal o „Husovo institutos.“ Paš lende avľe e Milena Hubschmannová, profesorka andro romipen pal o Indologický ústavos FF UK,o Emil Cina, savo irinel andre romaňi čhib, the mek aver manuša, save denas duma pal kada zoralo tematos.

O Kovač delas duma pal koda, so jov prindžardža andre peskeri buťi the koda, so sikhľiľa pre fakulta. Šukares phendža pal koda, kaj talam savore Roma hine andro le Deleskero pačaben, kajča o pačaben naľidžan avke sar o gadže, save phiren andro khangera, ľikeren o ceremonii. O Roma pačan jileha. Kajča nasikaven peskero pačaben andro dživipen avke, sar kampel. O David Dudaš vakerelas pal e historija, savi hin andro romano paťaben. Sikhadža pre koda, sar pes e „cirkev“ ľikerelas the ľikerel ki o Roma, the sar pes o Roma ľikeren kija late. E Milena Hubschmannova posikhadža pre jekh zoralo momentos: „Somas andro but romane fameľiji, u so mange peľa andre jak hin koda, kaj talam všadzi hin le Romen pre fala obrazi la Paneka Marijaha u ča varekhaj hin kerestos.“ Kada hin baro čačipen, u kampelas by te džanel, soske oda avke hin. O Emil Cina delas duma pal o romipen, the genelas peskere ginde andre romaňi the gadžikaňi čhib.
Savoro pal soste pes delas duma sas igen intereso, o čačipen hin, kaj o Roma pal o Del naľidžan diskusiji, navakeren pal koda, sar paťan le Devles u sar les ľikeren andre peskero dživipen. Adadžives keren o Roma poľitika, u pal koda, so hin andro paťaben but navakeren ani naduminen. Andre romani dživipnaskeri filosofija pes dikhel maj angluneder pre koda so amenge kampel akana. Kala filosofijaha džalas le Romengero dživipen andre calo historia, u talam angle koda o Roma nadikhen o paťaben andro Del avke sar o gadže, save peske o dživipen planinen anglal. O Roma mangen le Devles akor, kana lenge igen namištes, kana lende o meriben pre čhib, kana peren andre bibacht abo nasvaľipen. Akor lenge kampel kaj lenge o Del te pomožinel. Akor les mangen, akor sikaven kaj le Devles paťan. Te le Romenge nič nakampel, le Devlestar nič namangen. Kada hin čačipen, savo amenca džal šel berša, u phučiben akana hin, sar oda ela dijader ? Pro Roma akana peľa bari bibacht, u talam avľa koda momentos, kana savore Roma kamenas te sikhavel peskero paťaben andro Del, u te mangel les, kaj pre amende te ľikerel peskero bachtalo vast.

Dezider Giňa