Sar oda hin adadžives phares le bešibnaha talam džanen savore. Ola ko bešen andre bitovka, oda hin bare bachtale manuša, u ola ko bešen andro holobiti šaj en rado, kaj hin len dachos upral o šero. Kajča le ternen hin baro pharipen, bo len nane šancija te chudel bitos. Adadžives imar o fori naden khera sar angomis, akana hin avke, kaj le Romen čhiven andal o khera avri. Talam buter džene dživen avke, kaj andre jekh kher dživen jekhetanes duj abo the trin fameľiji. O čhave baron, thoven pes te dživel, kajča khera len nane.

Paľis pes ačhol oda, kaj dživen jekhetane o terne le phurenca. Le čhavenge uľon lengere čhave, u paľis hin bare problemi savoreha. Nane kaj te sovel, but pes poťinel vaš o paňi, vaš o udut,the váš o pľinos. Kajča kada užarel talam savore avre generacijen.
Vaš oda phučhav: sar ela e situacija paš o Roma le bešibnaha tel o panč, abo deš berš? Kaske hin adadžives dešupanč berš vaš o panč berš lela romňa abo romes. Kajča kaj pes thovena te bešel,te dživel? Buťi nane, la podporatar pes nadel te sthovel miľionos pre koda, kaj šaj manuš peske cinel kher. Le foren khera nane, u kada pes sikavel sar baro problem, savo pre amende tel vajkeci berša fejs perela. Imar akana pes sikavel, kaj o Roma dživen avke sar varekana. Savore pre jekh kopa andre jekh kher. Kavke oda džala generacija generacijatar, u ňiko nadžanel, so aleha kamel te kerel. Le ternen nane zor te arakhel peske buťi the bešiben.
Savoro so adadžive preľikeras sar pes del, ela vaš vajkeci berša le terne mek goreder. Savi hin šancija amare vnuken pre koda, kaj len ela buťi the kher? Sar dživena amare čhave the lengere čhave dureder? Sar oda ela le Romenca dijader? Kada hin but phare phučibena, u sar dičhol, ňiko pes pal kada nazajiminel avke, kaj pes adadžives te kerel vareso so pomožinela amare ternenge.Koda sar le Romen ispiden avri andal o fori, oda hin bari bibacht. Kaleha našaven amare čhave savore šanciji andre peskero dživipen. Kole kas hin bitos, ta e smluva hin lenca kerdži pre jekh berš. Sako berš hin rizikos, kaj len andal o kher čhivena avri.
Te džana avri andal o kher, le ternen nane šanca te chudel imar aver kher. Prindžardžom but fameľiji, save pele andre kadi bibachtali situacija, u nane len šanca oleha vareso te kerel. Somas te dikhel andro holobiti, kaj dživen andre jekh kher trin fameľiji, andre jekh kher dživen dešuduj manuša! Savore hine bi buťakro, le potporendar pes nadel te dživel u kavke džal e bibacht pal o phure generaciji pro terne. Aver mek hin koda, kaj o Roma hine pre jekh kopa, u paľis olestar hin bare problemi le žužipnaha. Maškar peste pes vesekedinen, savore hine nervozna le staroscendar, the le problemendar, u ňiko nadžanel so oleha te kerel. Kajča kada hin avke, kaj savore upre avaha meksa goreder, te oleha nachudaha vareso te kerel imar akana. Man hin dar kolestar, kaj paľis imar ela nasig.

Dezider Giňa