Le romengro dživipen andre ČR perel tele berš, beršestar. Andre amaro demokraticko sistemos pes lenge dživel moneki phares. Adadžives imar hin pre podpora maj savore Roma u pre savore pes dikhel sar pro nekhostatneder manuša. So lenca avela dureder, ňiko nadžanel u ki oda, mekh o parlamentos kamel te marel tele o podpori. Phenen, kaj oda nakeren ča anglo Roma, aľe kaj oda placinela pre savore manuša. Kajča musaj te phenel, kaj aleha avena marde nekhbuteder o Roma.

Te imar akana dživen sar nekhoststneder, ta sar pes lenge dživla akor, sar chudena meksa čepeder love sar chuden. Pre kada ňiko nadikhel, savore ča užaren pre oda, hoj sar o Roma chudena čepo love, ta kaj pes džana te marel, kaj džana avri te čorel o skľepi le chabenenca.
O medija imar ča užaren pre ada, kaj oda te sikaven le svetoske. Marakhel o Del, te bi pes avka ačhelas, ta o medija bi napisinenas, hoj došalo hin o socialno sisitemos, kaj jov kerdža le Romendar zbujňiken. Kaj o Roma gele te čorel anglo da, kaj te na meren andre bokh. Aľe pisinenas bi pal oda, kaj o Roma narespektinen o zakoni, the keren peske korkore so kamen.
Bud čechike redaktora mange vičhinel imar akana, mekh ňič pes nakerel u jon imar kamen te džanel či o Roma džana te čorel, abo na. O Čechi alestar moneki daran užaren oda, hoj amare Roma kerena oda isto, so kerde o Roma pre vichodno Slovensko.
Le gadženge marena tele o podpri tiž, aľe o medija lendar nadžan te phučel či džana te čorel. O žurnalisti džanen mištes, kaj te dodžala ke oda, hoj marena tele le manušenge o podpori, ta kaj nekhbuter pre oda dopočinena o Roma. Kada čačipen napisinena, perdal lende nane interesno te pisinel pal oda, hoj o socialno sisitemos le Romen marel, kaj len pekel tele kije phuv. Napisinena pal oda, kaj gadžes, andre buči len, aľe Romes na. Hoj pal o Roma kamen, kaj peske te rakhen buči korkore. Napisinena pal oda, hoj le štatos nane buči, aľe le Romendar užarel kaj peske la te rakhen. Kaj o Roma bešen khere, saste manuša, phure, terne, sako kamen lačhes te dživel, na te žobrinel. Kaj o Roma hine čore angloda, kaj len nane buči, kaj e demokracija pro Roma nadikhel. Kada hin o problemos, aľe o čačipen nane ko te phenel. O medija kamen ča te džanel či o Roma džana te čorel. Užaren mandar, hoj lenge oda te potverdzinav.
Mušinav te phenel, kaj adaj pes oda našči ačhel, bo adaj pro Čechi nane ajsi bokh, sar pre Slovaňiko. Adaj nane romane koloňiji, adaj pes le Romenge dživel ferder, adaj hin feder dživipen, adaj o Roma nameren andre bokh. O Roma pes nadena tele te pekel, aľe užrav hoj šaj keren varesavi maňifestacija, štrajki, revolucija u pre kada, len hin pravos.
Pre podpora hin buter gadže, sar Roma u lendar pes nadaran, lendar naužaren kaj džana te čorel? Sar naela le manušen sostar te dživel, ta čorena savore, či gadžo, či Rom.
Te pes ačhela hoj marna tele le manušenge o podpori, ta duminav mange, hoj e kriminalita džala fejs upre, the moneki barola. Vaš oda bi talam elas feder te rješinel e nezamestnanosca, sar te lel le manušenge o love.
Štatne zakazki hin, adaj peskre tovarňi budinem the o cudza štati. U vaš oda mange duminav kaj bi pes rakhelas sistemos, sar adaj te rješinel e ňezamestnanosca. Le Romenca musaj te rachinel tiž, paš o komunisti o Roma chande avri savore inžiňirska siťi, nadaran bučatar, buči džanen te kerel.
Te pes ačhel varekaj andro svetos bari katastrofa, ta e ČR mindžar odoj bičhavel o bare love the pomožinel avka kaj hin te dičhol hoj pomožinde. O gadže bičhaven o love le esemeskenca, bičhaven pro konti, the keren humanutarna zbirki. Hin oda moneki lačhes kaj manuš manušesko pomožinel.
Avka sar adaj dživen o Roma, ta duminav mange kaj oda hin tiž bari svetovo but beršengri katastrofa. Čechiko katastrofa, mi sikaven o Čechi calone svetoske sar adaj dživen o Roma, pačav oleske kaj o svetos lenge šigitinla tiž. Te šaj šigitinel le rukonenge, ta šaj šigitinel the le Romenge. Oda hin the čechiko problemos, došaľi hin calo společnosca, na ča o Roma. Kajča hin te dičhol kas hin pravos pro dživipen, kas na. Le Romen kamenas te kinožinel avri, te labarel upre, kaj te našľol amoro romano rat.
Hoj marena tele le manušenge o podpori oleha le Romenge našigitinena. O romano problemos ačhela dureder u le Romenge pes dživla meksa goreder.

Gejza Horváth