Somas te dikhel Plzňate pre Vinice, sar ode džal e buťi le Romenge, save pes thode jekhetanes. Vakeravas le muršenaca, savenca pes džanav čirlatunestar the kolenca, save pes paš lende thode nadočirla. Plzňate dživen talam šov ezera Roma, kajča hine rozčhidel pal o kotera.

Varesave bešen andro centrum, aver dživen pro Slovany, Bory u majbuter dživen pro Vinice. Dživel ode the o Dezider Balog, savo sas poslancos u akana kerel podnikatelis. Kajča nasas man bacht les te arakhel. Duma davas le Ludvik Bihári, savo kerel buťi andre romani organizacija. „Amen kamas te kerel buťi ake, kaj te hazdas amari zor andro regionos. Kavke oda keren všadzi u amen andro plzňakero regionos pes thodžam jekhetanes oka beršestar. Hin ade manuša, save keren buťi maškar o Roma imar buter sar deš berš – o Bugoš, Tišer, Csonka the mek aver. Kajča korkore nabirinen te kerel kajci, so šaj keras jekhetanes.
O problemi ade hin kajse, sar všadzi avrether. Le Romen nane buťi, kaja te bešel u dikhas the pre koda, kaj but Roma hine nasvale. Pal o phureder generaciji pes tiž nadel duma, u kada savoro kamas te kerel jekhetanes avke, kaj olestar te avel chasna savoren.“ Sar dikhlom e buťi savi keren romane organizaciji andro aver fori, sakovar pes sikavel jekh baro problemos.
Korkore maškar peste nane le Romen pataben, u kolestar džan avri bare komplikaciji. But pes pal kada vakerel the maškar o gadže, save posikaven pre koda, kaj pes o romane šerale nabirinen te dovakerel korkore maškar peste.Talam Plzňate ela feder situacija, bo andro regionos nane but romane organizaciji, save keren buťi maškar o Roma. Buter hin gadžikane organizaciji, save keren pro Roma projekti pal o drogi, buťi le čhavenca the le ternenca. Patav, kaj kampel te hazdel kajsi romani organizacija, kaj savoro te birinel te lel andro vast avke, kaj korkore o Roma te keren buťi angla peste. Love pre kajsi buťi hin khatal e EU, kajča kole ko kamen te chudel granti, mušinen mište te achalol la butake,savi pes kamel te kerel maškar o Roma.
Khatal o strukturalna fondi EU šaj džan pro romane projekti but love, u kampel te arakhel godžaver manušen, save mište achalon andre lokalno the regionalno politika. But zaležinel pal koda, sar o Roma birinena te cirdel jekhe dromeha. Sar vakeravas le manušenca Plzňatar, akana hin bari dzeka maškar o Roma te del vast kole dženen, save avena lačhe projektoha. Kada momentos kampel te lel andro vast, u te thovel pes zoraha paš peste. O Bihari patal, kaj polokes o manuša arakhen drom kie lende, u sar lende ela kisni e buťi pro projekti, ta o Roma lenge pomožinena andre koda, kaj pre oda te chuden love.
Kada hin la rada lačhes andre angluni buťi, u dikhaha, sar lenge džala dijader.

Ondřej Giňa