Andre khangeri Rokycaňate, kaj sogaľinel romano rašaj, o David Dudáš sas baro inepos. Dživeseste 21. 6. 2005 sas oleske trin berš, kana sas pošvecimen e khangeri le arcibiskupoha Kryštof, u kada džives hin paš e khangeri likerdo sar baro inepos. The kada berš pes likerelas bari omša, savi lidžalas o arcibiskupos mek avre pandže rašajenca. O David sas lenca sar o terneder rašaj, u savore jekhetanes likerde bari šukar omša vaš savore manuša, vaš lengero sascipen the šukar dživipen.

Andre khangeri pes jekhetanes sgele o Roma, Ukrajinci, Rusi, Rumuna the Čechi, kaj jekhetanes te palikeren le Devloreske vaš savoro, so amen sako džives del kio dživipen. Sas oda igen šukares sar paš peste terdžonas savore manuša, u niko lendar nadikhelas pal koda, sar dičhol koda aver. Šukares pal kada diňa duma o arcibiskupos, savo posikadža pre koda, kaj sam savore le Devloreskere čhave the leskeri buči. Vaš oda pes mušinas te likerel avke, sar o Devloro kamel. Sar leskere čhave. O manuša save avle andre khangeri, sas lošale kaj e buči, savi kerde o Roma, akana sogalinel savorenge. Ango trin berša sas e khangeri phagerdži, bo upreder biš berš ode niko navaleas, u e khangeri sas phandli. Sar avľa o David Dudaš, ta anglal so chudľa te kerel sas koda, kaj prikerdža peskera famelijaha savoro, so birindža ...
Andre povala sas cheva, o fali sas melale, o lavici phagerde, u všadzi sas baro melalipen. Savori angluni buči, kardža e famelija le rašajeskeri u palis pes paš lende thode avre džene, save parňarde, pratinde the kerde aver buči pre koda, kaj pes šaj te chudľa te kerel o omši the savoro, so pes andre khangeri kerel. Kerdža pes bari buči, u sako džanel, kaj o David the leskeri famelija – o Dad, o phrala kerde koda majbareder koter. Vaš kada lenge o arcibiskupos the savore manuša but paľikerde, u pre kada baro inepos pes sikadža, kaja le David hin maškar o manuša bari pačiv, u leskera famelija tiž avke. Sar sas agor la omšake, savore avle andre bar, savi hin paš e khangeri, u ode denas duma pal savoreste, so hin maškar, so pes kerel, the so kampel te kerel le Romenca, kaj len te avel feder dživipen.
Andre kada momentos avľa bari kritika pro romano nipos. Hin ade baro lačhipen, savo avľa le Romenge khatal o Del, kajča o Roma visaľon dumeha the ke koda, so lenge andro vasta o Del thodža. Pro čačipen hin avke, kaj andre khangeri phiren ča vajkeci Roma, u kole avren nane dzeka te avel barča jekhvar kurkeste te avel pre omša. Amen o Roma sam kole, savenge kampel te pomožinel, amenge kampel feder dživipen, amenge kampel buter respektos avrendar, kajča amen sam tiž kajse manuša, save nisostar nabajinas, sam leniva sar džuva.

Dezider Giňa