(Mileně Hubschmannové) - Jan Horváth

O manuš, kana ul'ol, rovel,
e daj the o dad lošanen.
Barararen les šukar,
pativales, avka sar kampel.
Tu, amari phenije Milen,
tu tiž amence sikhadžal,
Pre savo drom te džas.

Savi gil'i te gil'avas,
amari romaňi čhib
te gul'aras.
Tiri buti, tiro dživipen,
tiri cali zor sinal amare
Niposke, le Romenge. Phirdžal them themestar,
Romano dživipen sikhl'il'lal.

Sar te dživel, sar jekh
avre rado ter dikhel.
Tu Milen, salas amaro
vydus pre kada šilalo,
šitino avetos.
Tu amence sikhadžal
o drom, amen pre ada drom džas the dživas.

„Vakeren romanes,
na gadžikanes, ma ladžan pes vaše duma romaňi.“

Ola tire lava sar brišind andre bari truš, sar balvan andro baro keradžipen.

Sal pašo amaro somnakuno Devloro, u amen dživas
u tuke sol'acharas:

„Amara gul'a čhibaha
vakeraha, romanes
duma daha.
Amaro romipen bararaha, šukar romane gil'a gil'avaha.
U pre tute, amari
bari romaňi phenije
the dajori šoha
napobisteraha.