Agorutni buči savi sas kerdži pal koda, kaj pes te hazdel romani reprezentacija andre Čechiko, sas te kerel Parlament Romů ČR. O Milan Ščuka pes andre kadi buči thodža zoraha, u ispidelas kie koda, kaj peske o Roma te alosaren manušen, save pes tovena vaš savoro, so lenge kampel. Koda, so pes kalestar užrelas, naavila majbuter the angle koda, kaj adažives barol terni generacija, savi kamelas te džal andre politika, kajča varesar lage nadžal. Kadi generacija kamelas te lel abdro vast savoro, so pes kerdža andro 90. berša.

Kajča sar dičhol, nasam pre kada kisitimen. O terne romane aktivisti vakeren, kaj len o phureder naden šanca the pativ avke sar kampelas. Talam avke hin čačipen, kajča musaj te dikhas, kaj o terne aktivisti nane kajse zorale sar kampel, nane energicka andre kodi buči, savi kampel te kerel anglo aver Roma. Sar kampel, ta pes nasikaven avke, hoj pes maren vaš savore aver Roma the vaškoda, so lenge kampel. Lemgeri pozicija kio rasovo segregacija, rasovo diskriminacija the goreder pozicija savi hin le Romen nane prindžardži sar kampel. Talam hin namište andre koda, kaj o phureder romane aktivisti le ternenca nadel duma sar kampel, naphenel lenge pal savoro so prindžarde andro dešušov berša palal, the koda soha jon pregele.
O dialogos maškar o romane generaciji amenge igen but kampel, u andre kadi situacija so sam džal pal amaro romano dživipin, savo nasas angomis phaglo avke, sar akana. Dičhol oda the pre koda, sar o romane generaciji hin pestar dur, sar našči arakhen jekhetani duma, kavke sar oda sas maškar amare anglune. Kada tematos kampel te lel andro vast u te rodel šajipena, sar e situacija te prikerel.
Simpaticko hin e buči, savi andre kada kerel romani organizacija Athinganoi, majbuter lakeri šerutni e Gabriela Hrabaňová. E organizacija džal pal o terne manuša. Pomožinel le romane študentenge, terne šeralenge the aktivistenge. Kada hin buči savi kampel, u apška mek keren the komunikacija le puredere romane aktivistenca. Kavke bi kamenas te kerel buči the aver romane organizaciji, save phenen, kaj keren buči anglo Roma. E situacija sikavel, kaj andre kale buča mušinen te aven o terne generaciji. Akana kampel, kaj o terne te džan anglal peskere džanipnaha, te chuden pes andre politicko buči. O phureder lenge mušinen te del peskeri godži the savoro so siklile andre peskeri buči. Savore informaciji save le ternenge kampel musaj lenge te del, kaj mištes te keren andre koda, soske pes phenel „romani problematika“.

Ondřej Giňa