Aver manuša pes khatal o romane ghetta likeren serate. Pal koda sar ode o manuša dživen, nadžanen nič. Sar pes manuš dochudel andro ghettos the savo ode hin dživipen, mange vakerelas jek romni, sava hi štar čhave the ochto vnučata. Koda, so pes ačhila lakera famelijake, pes ačhila the but avrenge, kajča so joj vakerelas amenge sikavel koda, so avral nadičhol. Soske pes o romane fameliji dochuden dži pro agor, u soske peren andro ghetto. „Dživahas andre bytovka, u sar mek o rom kerelas buči, varesar pes likerahas. Kajča sar našadža e buči ta gela pre podpora, palis samas pre socialka, u kalestar pes nadel te dživel. Le čoripnaha the la bidaha manuš siklol te dživel. Te amen hin vareso te chal, hin amen šukar džives.

Majbuter so kampel hin, kaj te chan o čhavore, kajča oda nane lokes bo ani o maro the rohliki naden nikaj hjaba. Choc te oda nane baro chaben, sar nane sostar te cinel, ta oda hin igen phares. Kajča kada nane koda mek goreder. Oda hin koda, sar nane sostar te počinel o kher, o pani, eletrika, plinos the koda aver so kampel andre famelija. Kalestar hin manušeske mek phareder. Kavke dživas but berša, u dživipen andre kale sakodživeseskere stresi amen murdarel. Savore andre famelija sam olestar nasvale, u savoro oda avel le stresendar, depresendar the la daratar, savi amen hin sakučko džives. Hin amen bare adošagi, kajča adadžive pes bio kaleske nadel te dživel. O rom chudla jepašutni invalidka, hin leske imar buter sar penda berša, vaš oda les nane šanca te chudel buči. Me som upre avke, sar the jov. O mek terneder čhavo phirel andre buči, u jov amen likerel, kajča koda so chudel nane dost pre koda, kaj pes te počinel savoro so musaj u olestar te dživas. Kole aver čhae amenge pomožinen sar pes del, kajča the len nane sostar te dživel.“ Sikadža pes, kaj permanentno psichicko pharipen džal manušeske but namištes pro sascipen. Kolestar aven but komplikujimen nasvalipena save avel le stresendar, depresendar. Andre romani populacija hazdlon o manuša pre save pele kardiovaskularna nasvalipena, diapetes the nadoriskere nasvalipena. But romane fameliji predživen bare pharipena andro sakodživeseskere starosci, dar the psichika pharipena. Sar peren dži pro teluno, butervar pes šunen feder, bo len imar nane so te našavel u palis imar dikhen ča pre koda, sar te predživel. Palis imar dživen koda „loko“ dživipen dživesestar pro džives. Pre odi bibacht hin kavke, kaj kalestar imar nane drom avri, bo e majorita le Romen nakamel, u peskeri nalačhi pozicija kio Roma nakamel te visarel.

Dezider Giňa