So majbuter romane aktivistenge avel pre godži koda, kaj pes mušinel te kerel nevi buči pal o problemi, save hi andro romane komuniti. Majbuter namište pes kada sikavel andro regioni u konkretno kada hin andre Plzňakero koter. O romane aktivisti phenen, kaj kada bilačhipen džal avri kolestar, kaj pro telune uradi nane dzeka te kerel buči pal o Roma.

Aver bilačhipen hin koda, kaja la vladakeri kocepcija pal e romani integracija hin imar purani, u nadžal pal koda, so akana le Romenge kampel. Romano aktivistas Emil Miko Rokycaňatar kie kada phenel: „Pašal amende džan bare nevipena, save pes zoraha sikaven andre amaro dživipen, kajča o telune uradi the la vladakere instituciji čahon kie savoreste kavke sar sas, u koleha napomožinen le Romenge andre lengeri integracija. Pal aver sera, te o uradi vareso kamen te kerel angle peste, savoro džal sigo u niko nadikhel anglal palal. Šaj oda dikhas pre oda, sar le Romen ispiden andro ghetta, save hin buter sar mek nadočirla, hjaba kaj ode pes hazdel o čoripen the socialno bangipen. La vladakeri koncepcija pal e romani integracija naši avel mištes kerdži, te o telune uradi paš kada terdžon šudrones. Andre kada kampel kaj e vláda te thovel zoraleder kontrola pre koda, so keren o telune uradi. Phučiben hin, soske oda avke nane,“ phučel o Emil Miko.
Hin čačipen kaj e vláda del o vast le romane the naromanenge iniciativenge, save kamen le Romenge te pomožinel andre lengeri integracija. Kajča sar kada hin pal o čačipen vakerel aver romano aktivistas Václav Miko. „Anglal mušinav te phenel, kaj o organizaciji šaj ča pomožinen andre koda, so mušinen te kerel o uradi. Andre praktika hin kavke, kaj o organizaciji keren talam savori buči savi pes kerel pašal o problemi, save hin le Romen andro romane komuniti. Mekgoreder pre kada hin koda, kaj pes o organizaciji dochuden tel o vast kolenge, ko len davkerel o love. Palis lenge naačhol nič aver ča te kerel koda, so pal lende kamen kole, so len davkeren o love. Kavke pes ačhol, kaj talam savore organizaciji dikhen ča pre peste, u koda so kampel te kerel anglo Roma džal pre sera. Dijader kampel te dikhel koda, kaj o Roma nane kode, kaj pes pal lende rozhodinel, u kole save hine pre varesave thana, nasas volime demokratickones. Kontrola pre savoreste so o uradi the o organizaciji keren hin minimalno.“
Kalestar džal avri koda, kaj o bivladakere organizaciji nane andre lačhi pozicija pre koda, kaj te prikeren o problemi, save hin maškar o Roma. Kada sikavel, kaj kampel te paruvel o sistemos.

Dezider Giňa