Tel o palune dešupanč berša pes ade le Romenge ačhile but bare nalačhipena, u phares te phenel, kana amenge sas goreder. Brutalna rasisticka murdaripena, sakodživesutne rasisticka ataki maškar o manuša, avri the khere andre amare khera. Sako džives amen maren tele andro amaro manušipen, u kda gela kavke upre, kaj oda dičhol sar te kada elas oficialno štatoskeri politika.

Kana bestialnones murdarde le Tibor Berki andre leskero kher, u paš oda sas leskeri romni the o čhavore, akorutno premieris Václav Klaus pes todža andre kale džungipena. Kajča murdarelas pes dijader. Murdarde sas e Bihariovo, Lacko, Absolon the mek aver Roma. E policija kerelas „phari“ buči pre koda, kaj te arakhel rasisticko motivos andre kale murdaripena. Kada lenge džalas phares, kajča te sas bilačhipen maškar o gadže the Roma, u te o gadžo phenelas kaj les Roma rakindža rasistickones, ta e policija takoj džanelas so te kerel. Nadočirla o gadže marde Orlovate terne romane čhas. Phagerde leske o pašvare, sas les razime e godži, pherdo basamuni the mek aver dukha.
Kajča e policija kerel „phari“ buči pre koda, kaj te arakhel o rasovo motivos. Pre aver sera, Ostravate o romane čhaja rakinde duje gadžijenge save phenen, kaj lenge o romnija rakinenas rasistickones. Pre kada o mujalo khatal e policija phendža, kaj oda sas rasisticko atakos, u kolenge ko kada kerdža džal pal o duj berš bertena. Andre kada sas la policija „loki“ buči, bo o gadžija phende kaj lenge o romnija rasistickones rakinde. Pal soste andre kada džal? E policija kerel peršo buči, kana pes ačhol varesavo kriminalno deliktos. Kidel dukazi, vyšetrinel the kerel mek aver buči pal savoreste so kampel, kaj te avl kio sudos savoro avke, kaj te thovel peskero verdiktos. Te phenava kavke – so majfeder buči kerela e policija kana len andro vast o deliktos, u te kerela lačhi the pačivali buči, ta paš o sudos hin šanca te arakhel lačho the pačivalo verdiktos.
Kajča phučiben hin, soske e policija avke „phares“ arakhel rasovo motivos paš o gadže, kana atkujinen le Romen, u soske avke „lokes“ arakhel rasisticko motivos paš o Roma, kana pes dochuden andro konfliktos le gadženca. Le Romen hin but čačutne indiciji pal koda kaj te napačan la policijake bo lakeri buči andro rasistična kriminalna delikti nane lačhi. Kmpel kaj te kerel e buči feder teh pačivaleder. Rasisticko motivos mušinel te dikhel bi o koda či les kerdža Rom abo gadžo. Kum někum, per kaske perel!

Dezider Giňa