Kavke sar andro aver fori, the andro Slané hin le Romen pharipena andro bešiben. Jekfar o šerale pre peskero bešiben phende, kaj andre legero foros kerena „Program nulové tolerance“ u kavke džana zoraha pal kole, ko kerena varesavo nalačhipen. Anglune, pre kaste kada „Program“ pela sas o Roma, save dživenas andre foroskeri ubitovna.

Sas oda kole, save napočinde vaš o khera, u lenca o šerale kerde kavkes, kaj len čhide avri pre ulica. O šerala nadikhle anglal palal, u našunenas pal koda, so phenen o romane the gadžikane organizaciji, našunde ani koda, so phnde andre kancelarija khatal o ombudsman. Romano aktivistas khatal o foros o Ladislav Červeňák rodelas žutipen avre Romendar andal aver fori. O Gremium le Romen andro Slané dina peskero vast, u bičhadža ode peskere bučaren te dikhen, sar hin e situacija andre ubitovna. Sas ode vajkeci dživesa, u palis pal kadi buči kerde informaciji, savi sikadža sar hin o čačipen. O šrale khatal o foros, kale informaciji ignorinenas, u terdžonas pre peskero koleha, kaj o Roma mušine te džal avri andal o khera. Nadočirla man dikhlom le Červeňakoha u davas leha duma pal oda, so pes ačhila le Romenca andre lengero foros, u kaj gele kole, so mušinde te džal avri andal e ubitovna. „Mušindžom te džal het khatal o Slaný, bo mira famelija sas bare pharipena angle koda, kaj pes ilom pal o manuša, saven o foros čhidža avri andal o khera. E situacija sas but phari talam ča angle koda, kaj o šerale le Romen nakiden avke, sar avre manušen, save ode dživen. Te upre dikhav adadžives, ta koda lengero „Program nulové tolerance“ sas ča narokom kerdo angle koda, kaj te čhiven avri le Romen andal o foros, saven ode nakamen. Mušinav te phenel, kaj vajkeci fameliji sas zoraha marde koleha, so pes ačhila. Kolen, saven sas avrether fameliji, ta gele kia lende, kajča oda hin but bare pharipena angle savore, bo lengere famelijen hin peskere problemi, u kavke lenge avile mek aver, bareder pharipena. Kajča kole, saven nasas kaj te džal ta sas upre mek goreder. Šundžom, kaj varesave fameliji gele andro veš u ode dživenas, abo mek dživen andre varesave cheva abo bngri. Kada hin benginalo efektos khatal o „Program nulové tolerance“ savo sas thodo le šeralenca andro foros Slaný.“

Dezider Giňa