Andre šmikňa labolas
tosarastar andre dat
bari bari jag
o trast andre tačarlas
pre kovinca bandžarlas
miro miro dad

Pipa pijelas, stadži urelas
kaľi cholov parno gad
leske ačhelas.

Lancos tover čokanos
le grajeske petalos
kerlas miro dad.

Jaro, maro, balevas
gadžo leske anelas
raj has miro dad.

Andre jag thovlas
baro koter trast
sako lestar džanelas
kaj kovačis has.
Gejza Horváth