Mra babakro nav hin Heľena. Uľiľa pre Slovensko andro gav Čemerne, andro okresis Vranov nad Topľou. Vakerlas mange sar has cikňi čhajori he so predžidžiľa andro dujto mariben.
„Andro gav avle but Ňemci. Mange has deš berš. Jekhvar rači sar džahas te sovel la dake phendžom: ,Mamo, sar zasovava he avena o Ňemci, ta uštav man!' O Ňemci čačes avle. O dad, e daj uštade savore cikne čhaven, aľe man imar nastačinde. Až paľis man došundžom so kamenas o Ňemci manca te kerel. Vaš oda hoj somas šukar, ta duj Ňemci pes halasinenas so manca kerena. Či man viľinena, abo man zgvaľcinena. Jekh Ňemcos phendžas kaj jov nazgvaľcinla cikňa čhajora, dujto phendžas ta viľinav la. O Roma denas pozoris sar dikhle so pes kerel savore avle andro kher he pro Del mangenas le Ňemcen kaj man te den smirom, kaj man te mukhen te dživel hoj som mek cikňi čhajori.

Jekh phuro Rom man uštadža upre sar dikhľom le Ňemcen, chudľom bari dar he rovavas. Jekh Ňemcos avľa ke ma, he diňas man pakľikos cukriki. Dikhľas kaj andre dar izdrav, hľadzindžas man pal o bala he asalas pre ma. O Roma man zachraňinde. Denaščom la oblakaha avri andal o kher. Rodavas le dades la da. Vičinavas: ,Mamo, dado, kaj san!' O dad man šundža he avľa vaš mange. Garudžam pes pro pados. Leperav mange kaj andro dachos has pherdo cheva. Varekana o lestar asav, aľe leperav mange pre kada vaš oda hoj sa mištes dopeľa.
Aľe has he bibachtales. Jekhvar rači šundžam sar vareko vičinel na žive rati: ,Pomoc, pomoc!' Phureder Romňi vičinlas pre mro dad: ,Kirveja mangav tumen pomožinen mange. O Ňemci viľinde mange le romes u šov džene ile mange la čha.’ O Ňemci viľinde le Romes vaš oda bo nadomukhelas lenge kaj leske la čha te zgvaľcinen. No, he avka la zgvaľcinde andal leskre jakha u paľis les viľinde.
Amen našci ňisar pomožinahas bo tiž amen darahas. O Ňemci has bare choľamen. Viľinenas, čhivkernas o granati sar diľine. Narado mange pre oda leperav.
Našči pes aňi thovahas, aňi našči chahas. Džanav kaj furt pes garuvahas. Andre jekh kheroro samas biš džene. Andro kher amenca has he o graja, bo o Roma len rado dikhenas. Dživahas čores, andre mel, andro džuva, andro šil. Aver čhavenge has lačhes, bo lengro dad has ačhľas lenca khere. Aľe amaro dad has andro mariben, samas korkore.
Renata M., České Budějovice
Do romštiny přeložil Gejza Horváth