Ki o Brnos avle Roma pal e Slovensko Skrabskatar te bavinel fotbal. Dikhľom sar o čechike he o slovaňike Roma ľikeren jekhetane. O Roma pal e vichodno Slovensko phučkernas mandar sar pes adaj pro Čechi dživel le romenge. Phendžom lenge o čačipen avka sar hin kaj le Romen nane buča, dživen ča la podporatar kaj hin adaj rasismus, diskriminacija. Tiž lenge phendžom kaj o čechike Roma denašen, kamen te dživel avrether. O Roma Skrabskatar mange tiž denas duma sar dživen jon pre Slovaňiko.

Milan Horváth (56 let)
Bešav andre romaňi osada pre vichodno Slovensko Skrabskate andro okresis Vranov nad Topľou. Hin man šov čhave, som imar papus.
Ki o Brnos pro fotbal avľom jilestar. Hin man adaj o phrala, o pheňa. Avľom te dikhel he le Romen amare rodaken Skrabskatar so imar but berš bešen adaj Brnoste. Kamavas len bares te dikhel sar dživen, so keren. Kamav kaj te avas jekhetane, kaj pes te ľikeras bo sam Roma. O Roma pro Čechi dživen feder, hin len bareder počiňiben sar amen pre Slovaňiko, aľe tumare Roma musaj te počinel o bešiben sako čhon. Amen Skrabskate počinas ča jekhvar beršeste. O dživipen pre Slovaňiko hin phareder, nane amen andro khera paňi, plinos, nane amen aňi droma, aľe ľikeras savore jekhetane. Kamende o Roma pačan Devles, phiren andre khangeri. Nahalasinen pes, namaren, ľikeren jekh paš avreste. Sar hin avri tatores o terne čhave len o sersami, avri pro pľaci bašaven, khelen, hin vešelones. Me som lavutaris – bračošis nane man kaha imar te bašavel, bo o phure lavutara, o primaša, o bugoša imar mule avri. O terne amaro phuro romano bašaviben nadžanen.

Josef Pešta (47)
Imar štar berš som romano vajdas andre osada Skrabskate. Zvoľinde man o Roma vaš oda, bo čirla mro dad has tiž vajdas u o Roma pačan mange. Starinav man pal lende, phirav pal o starostas, phenav leske so le Romenge kampel, so kamen, so hin bibacht, so lačho. Imar kerde amenge drom ki e romaňi osada, aľe paš o Roma mek drom nane. Pro pľaci kerdžam chaňiga, žužardžam avri e bari jarka o Hornados. Ča jekh bibacht hin kaj le Romen nane buča, nane kaj te kerel u o gadže len aňi nakamen. Paš o komuňisti savore Roma kernas andre cimentarňa. Dživlas pes lenge feder sar adadžives.
O čhavore phiren andre zakladno škola, varesave čhavore phiren tiž andre zvlaštno. Hin he avka kaj varekana o čhavore andre škola aňi nadžan, bo nane len love pro autobusis. Kamende andro gav nane žadno rasismus, o gore lačhe. Andre karčma bešen le Romenca paš jekh skamind. O starostas baro lačho manuš, pro Roma nadel te domukhel.

Milan Ferenc (52 let)
Sar chuden amare Roma o love, cinen chaben, keren bari zasoba. Sako dživel avka sar pes del. Aľe kas hin but čhavore, dživel goreder. Andre osada uľon beršeste duj trin čhavore. O Roma phiren andro veš hubenge, he richtinen peske o kašta pro jevend. Andre osada nane drom. Manuš urel pro pindre žuže topanki u kim dodžal andro gav, ki o autobusis hino zamakhlo la čikhatar. Kamas bi mange rači te džal andre moza, aľe kamende andro gav kajso vareso nane. Dživel pes amenge phares, aľe nadžas bi ňikhaj, andre Angľija aňi avrether andro svetos. Me bi kamas kaj man te avel andro kher budaris, kupeľňa, kaj šaj pes o čhavore thoven kaj ňiko amendar te naasal. Kamas bi kaj man he mra romňa te avel buči. Gadžes len andre buči u Romes na. E slovaňiko vlada pal o Roma nabajinel, aľe sar kampol te džal te voľinel ta akor le Romen rakhen.
Gejza Horváth