Sar avav maškar o Roma save avle pale khere khatal e Anglija abo khatal aver phuva, talam sako bajinel kolestar, kaj avle pale. Akana hin igen phari situacija le Romen andro bešiben u o fori thoven kajsi politika, savi sas varekana anglo mariben. Savoro dičhol avke, kaj le Romen naela than kaj te dživel. Adadžives kole so dživen andro Holobiti šaj hazden o vasta kio něbos hoj len hin kaj te bešel. Vakeravas terne romane čhaha, savo nadočirla avľa khatal e Anglija, kaj dživelas štar berš. Hin les trin čhavore u visaľiľa pale bo chudľa „deport“.

Sar avľa ke peskeri famelija u prindžardža savo ade akana hindživipen, ta igen bajinel kolestar, kaj avľa pale. „Andre Anglija sas o dživipen pharo angle koda, kaj manušeske igen unisaľol, u sar nadžanel e duma, ta hino sar bio šero. Sas man kodi bacht, kaja man sikhavelas e duma miri terneder pheň, savi mištes sikhľiľa e anglicko čhib. Sako džives vakeraha anglicki, kaj so meksigeder te sikhľuvav e duma, u tel jepaš berš imar džanavas te phenel koda so mange kampelas kio dživipen. O čhavore phirenas andre škola, u jon e duma sikhľile meksigeder. Koda savoro hin igen pharo andre phuv, kaj ňikas nadžanes, u savoro musaj mekča te prindžarel. Kajča ade bariľom cikne varbastar, džanav e duma – romaňi the gadžikaňi, kajča o dživipen ade kajso pharo, kaj mage olestar pukinel o šero. Sar avľom pale ta paťavas, kaj pes ade imar dživel feder, kaj imar ade nane le Romen kajse problemi sar anglo štar berš. Sar dikhav so pes ade kerel andro fori, ta pre mande avel bari dar. Sar oda džala dijader? So amenca ela tel aver štar berš? Nadžanav so pre kada te phenel, ča džanav, kaj oda naela nič lačho. Všadzi šunav sar le Romen nane buťi, save len hin bare adošagi, sar savoro bikenen andro zastavarni, sar peren tele andre peskero dživipen. Nadžanav so ela dijader, sar savoro bikenaha, sar amenge ačhona nange vasta, sar amen naela khera, sar amen tradena andal o fori. Te kada džanľomas, ta kerdžomas savoro angle koda, kaj te ačhuvav kode kaj somas.“
Kavke mange vakerelas terno Rom, savo prindžardža feder dživipen, kajča the pre leste peľa kajsi depresija savorestar so ada pre dživas, kaj leskeri terňi saci energija polokes našľol sar dikhel o dživipen savo ade le Romen hin. Džanav, kaj imar dešuštar berša pes ade pal kada del duma, u koda so užaras feder, ta nane te dičhol. Kajča sar savore peraha andre depresija, ta savoro ela mekgoreder. Varesar pes našťi hazdas pro pindre, u nabirinas peske korkore te pomožinel. Phenas, kaj kada hin amaro mekbareder problem. Dikhľom Romen, save pele igen tele andre peskeri bibacht, kajča te avel pre koda, kaj pes korkore te hazden, ta avke dičhol, sar te imar korkoro pestra nabajinenas. Vakeravas le Romenca andro Slaný. Nakeren nič, ča užaren pre koda, kana len čhivena avri andal o khera. Kajsi rezignacija hin goreder, sar nasvaľipen. Manuš ačhol sar bakro, u nisostar nabajinel. Koda terno manuš polokes našavel peskeri energija, u naľikerela oda but, u the jov perela andre depresija, andro nasvaľipen, savo pre amende perel sako džives goreder. Paľis amenge naačhola nič aver, ča te mukhel tele o šere sar bakre, u te ľikerel savori bibacht, savi pre amende perela. O Romoro bajinel, kaj avľa pale. Soske pes na thovel vaš koda, kaj the ade peske te dživel avke, sar dživelas andre Anglija?

Ondřej Giňa