Rom Romeha – imar oda nane čačipen

Romale phenav tumenge sar hin o čačipen – adadžives Roma Romenge e cipa tele cirden, u mek peske duminen hoj lenge šigitinen.
Talam imar džanen, pal soste kanav te vakerel. Nane tumen love, nane tumen so te chal? Počindžan o pľinos, o udud, o kher, u pro chaben tumenge imar naačhiľas? Ta so akana kerena? Kaj džana lovenge, sar tumen e banka kečeň nadela? Šaj džan pal o barvale Roma, jon tumen radišagoha kečeň dena.

„Keci kames? Le ezeros, hin tut kana pale te del, šaj des mange pale aver čhon, kajča jekhvar ajci … Pale deha mange duj ezera.“ Avka varesar vakeren ola manuša so den kečeňa pro interešis. O gadže lenge phenen úžerníci, lichváři.
Pro čoro nipos aviľas bibacht ideos, dživel pes lenge phares, savoro hin kuč, nane love, andro kher but čhave, so kamel čoro manuš te kerel? Te chal kampel sako džives. Sar jekhvar pes chuden andro adošagi, ta igen phares pes olestar avri mentinen.
O lichvara hine vibite, bijejileskere džene, sar džan peske o Roma pre pošta vaš e podpora,l ta jon lendar o love takoj len cirden pal o Roma tele e cipa. Hin oleha baro pharipen. O šerale nadžanen so oleha te kerel u o Roma tiž hine diľine. Džan pre policia te žalinel le užerňiken, aľe peskero lav len daratar pale, savoro tajinen, bo o ľichvara len maren.
Save Romen, nane buťi, hin len ajse bare adošagi, hoj imar nane štonc te počinel o khera. O fori the o majiteľa kajse Romen čhiven andal o khera, pre uľica. So oleha kheraha Romale?
Našti pre oda ča dikhas, sar Rom Romestar e cipa tele cirdel u amen na keras ňič. Ľikeras o muj. Aľe pro gadže keras bida, save hine benga, sar amen nakamen u amen korkore sam goreder sar o gadže. Hin oda lačhes?

Jan Horváth,
Bílovec